Mibahad si Cebu City Mayor Edgardo Labella nga mahimong sa prisuhan ang sangputanan kung mag-prank call ang usa ka indibidwal.
Kini human nga nakadawat ang Department of Education (DepED) og tawag sa wala matinong caller kalabot na sa giingong gitanom nga bomba sa usa sa mga tunghaan sa dakbayan.
Tungod sa hulga, daling miresponde ang mga bomb personnel sa Cebu City Police Office ngadto sa mga public schools apan wala silay marekober nga bomba.
Samtang miresulta ang maong kahasol sa class suspension sa Mambaling, Basak Pardo, Tisa, ug Labangon aron lang maluwas ang mga pupils.
Matud ni Labella nga gitultulan karon sa otoridad ang misteryosong “prank caller” aron pahamtangan og silot.
Kini gumikan lang sa pagpanghudlat sa hugot nga seguridad sa dakbayan.
Nasayran nga giduso ni Senador Christopher Bong Go ang Senate Bill 400 o Anti Prank Callers Act of 2019 aron himoong usa ka criminal offense ang paghimo og mga prank calls nga moresulta sa dakong kahasol sa komunidad.
