Mimando si Cebu City Mayor Edgardo Labella ngadto sa Prevention, Restoration, Order, Beautification, and Enhancement (PROBE) team nga dili na pa-imbargohan ang baligya sa mga vendors kung maabtang naninda.
Kini nahimong resolusyon subay na sa viral video sa usa ka fruit vendor nga giilogan sa PROBE team sa iyang tinda sa dihang naabtan kining namamligya kilid sa kasada sa Brgy. Mabolo.
Matod ni Labella dili angayan nga sakmiton ang mga tinda niini gumikan kay aduna silay pohonan ug inutang ang uban pa niini.
Human nga nakita sa Mayor ang maong video, dali usab kini niyang gipa-imbestigaran ang maong isyu sa City Attorney’s Office.
Subay sa maong panghitabo, gibutyag sa Mayor nga kung kinsa man ang molapas sa maong kamandoan sa pagpamuyag sa PROBE ngadto sa mga vendor, ipataktak kini sa serbisyo.
‘Maayo ang desisyon’
Gihulagway sa lider sa mga sidewalk vendor nga si Basan Amura nga mas maayo ang desisyon ni Labella nga dili na imbargohan ang mga butang sa sidewalk vendors nga maabtan sa PROBE team nga naninda.
Sigon pa ni Amora nga sa una sa nangampanya pa ang mayor, misaad kini nga dili i-demolish ang gamit sa mga vendors.
Mihangyo si Amora ngadto ni Labella nga kaloy-an sila kabahin sa ilang kahimtang diin halos kada adlaw na sila gabalik-balik sa city hall.
Kini aron makuha ang mga hinabang nga gisaad sa Cebu City Government. (Lahvi Quiñones)
