GIKALIPAY ni Mayor Edgardo Labella ang taas nga rating sa dakbayan sa Sugbo gikan sa Department of Interior and Local Government (DILG) tungod sa gipahigayong clearing operations sa dalan Colon ug Osmeña Boulevard.
Matud ni Labella nga na-appreciate sa maong ahensya ang ilang mga pagpaningkamot maong angay nila kining pasalamatan.
Gipasalamatan usab sa mayor ang mga sidewalk vendors human nga nasabtan ug misanong sa kamanduan ni Presidente Rodrigo Duterte nga mao ang paghawan sa bisan unsang mga nagbabag sa dalan.
Nakita usab niya ang pagpaningkamot nilang PROBE head Raquel Arce ug City Market Administrator Junel Matugina alang sa paghawan ug pagpabalhin sa mga apektadong manindahay ngadto sa mas haum nga lugar.
Mipasalig ang mayor sa dakbayan sa Sugbo nga adunay itanyag nga programa alang sa panginabuhi-an sa mga apektadong sidewalk vendors.
Gikalipay usab ni Maria Pino, ang head sa Cebu City United Vendors Association (CCUVA) ang assessment sa DILG mahitungod sa road clearing operations.
Atol sa ilang meeting kauban ni Labella, gibutyag ni Pino nga misaad si Labella kanila nga makabalik sila sa ilang naandang pwesto apan kinahanglan pang i-upgrade ang ilang pwesto.
Matud ni Pino nga panindoton pa ang ilang pwesto sa pagpaninda aron nga mahimo kining tourist attraction sa dakbayan.
Wala pa hinuon mihatag og petsa ang City Government kung kanus-a sila makabalik sa ilang pwesto partikular na sa Downtown area.
