CEBU CITY — Gitataw karon ni Cebu City Mayor Edgardo Labella nga ang mga barangay officials mismo mao ang mo-facilitate sa mga hinabang nga ihatag alang sa mga apektado sa enhanced community quarantine nga dala sa COVID-19 pandemic.
Kini nunot na sa mga tahong nadawat kalabot na sa giingong pag-apilapil sa mga sakop sa Mayor’s Information Liason Officer (MILO) sa paghatag og hinabang ngadto sa tagsa-tagsa ka mga pamilya.
Gisegundahan karon ni Labella ang pamahayag ni Duterte nga adunay pamulitika sa paghatag og hinabang maong daghan usab ang mitiyabaw gumikan sa pakyas nga pagtabang.
Tungod niini, mipadayag ang mayor nga dili na paapilon ang mga sakop sa MILO sa paghatag og mga hinabang ug ang mga barangay officials lang sanglit aduna silay liability kung adunay kahasol.
Kini sama lang sa paghatag og 25 ka kilos sa bugas, inubanan sa pipila ka mga de lata alang sa mga labing kabus nga mga pamilya.
Hangyo karon ni Labella sa mga Sugbuanon nga dili ipatigbabaw ang partiduhay ug pamulitika nunot ning nasinating krisis nga dala sa coronavirus disease.
‘Tutukan usab sa hingtungdang ahensya ang paghatag og relief goods’
Gihimug-atan ni Cebu City Councilor Dave Tumulak nga importanteng tutukan ang paghatag og hinabang ngadto sa mga hilabihang apektado sukad nga gipatuman ang enhanced community quarantine pass sa dakbayan.
Kini ang nahimong reaksyon ni Tumulak human nabalitaan nga giingong gihatag sa mga kabanay sa Mayor’s Information Liasion Officer (MILO) ang mga hinabang.
Matud ni Tumulak nga dili sayon ang paggamit sa P1.6-billion nga pondo sa City Government maong nanghinaut kini sa patas nga paghatag og ayuda.
Hangyo karon sa konsehal nga magtinabangay gayud ang tanan sa paghatag og ayuda aron dili na mausab ang nahitabong mga kahasol sa pipila ka mga barangay. (gn)
