CEBU CITY — Gikumpirmar ni Lapu-Lapu City Mayor Junard “Ahong” Chan nga padayong gitrabaho ang labing dakong krus sa kadagatan sa Brgy. Tinago, isla sa Olango.
Kini subay na tinguha nga makahupot og world record sa pagbaton og labing dako nga underwater cross sa kalibutan.
“May tuyo kitang hulipan ang kasamtangang record holder sa Guinness World of Records nga anaa lang 70 meters nga gitas-on kay ang atoang cross moabot sa 100 meters,” sigon pa sa social media post ni Chan.
Nagtinabangay ang mga trabahante aron matukod ang krus nga hinimo sa corals diin mahimo kining puy-an sa libuan ka mga isda ug uban pang sea creatures.
Dugang pa ni Chan nga magsilbi kining timaan sa dakong pagtuo ngadto sa Ginoo ilabi na nga nahimong grasya ang proteksyon sa mga Oponganon taliwa sa coronavirus pandemic.
Makatabang, matud pa, ang maong proyekto aron makaagni og mas daghan pang langyaw nga turista sanglit giila ang kadagatan sa Mactan isip best diving sites sa Asya.
“Magdala kini og dakong dungog sa atong syudad ug maila kita sa tibuok kalibutan,” sumala pa usab ni Chan. (gn)
