Ipasubasta ang labing karaan nga stone tablet diin adunay suwat sa Ten Commandments.
Ang tipik sa bato kay gibanabana nga gikan sa 300 ngadto sa 800 AD, gatusan ka tuig human nabuhi si Jesu-Kristo. Kini usa ka marmol nga slab ug may gibug-aton nga 52 kls.
Gigamit kini sa pagsuwat sa Ten Commandments sa Paleo-Hebreo nga script diin ang sistema sa pagsuwat nga gigamit sa panguna sa biblikanhong mga gingharian sa Israel.
Matod sa Sotheby’s auction house, ang subasta ipahigayon karong Disyembre 18, 2024 ug aduna kini inisyal nga presyo nga $1 – $2 million o P116 million apan gilauman pa nga mosaka pa kini.
Kini unang nakubkoban sa habagatang baybayon sa Israel niadtong 1913 ug ang makasaysayanhong kahulogan niini wala dayon mailhi.
Gigamit pa gani kini ingong ‘paving stone’ sa usa ka balay sa Israel hangtod sa 1943 ug sa ulahi, usa ka eskolar ang nakakita niini ug nagtino sa bili niini.
