CENTRAL VISAYAS-Gipahigayon ang pormal nga presentasyon ug pagtugyan sa gigahin nga resources sa Police Regional Office VII sa SRP World Tent City kagahapong adlawa lakip na ang labing menos 12,000 ka tropa sa Central Visayas nga gipakatap para sa inisyal nga security operations aron pangandaman ang umaabot nga Barangay ug Sangguniang Kabataan Elections 2023 sa Oktubre 30, 2023.
Ang mga personahe nga nahilambigit sa maong kalihukan naggikan sa nagkalain-laing ahensya sama sa Philippine National Police (PNP), Armed Forces of the Philippines (AFP), Philippine Coast Guard (PCG), Bureau of Fire Protection (BFP), National Grid Corporation of the Philippines (NGCP), ug sa Cebu City Disaster Reduction Management Office (CCDRMO).
Sa pikas nga bahin, sa pipila ka adlaw nga pangampanya, wala kaayoy natala nga bisan unsang matang sa kakulian, ug ingon man nga malipayon ang mga kadagkoan sa kapulisan sa kooperasyon sa mga katawhan.
Mao kini ang gibutyag ni Lt. Col. Janet Rafter, ang Deput y City Director for Operations sa CCPO.
Matod pa nga hapsay ug malinawon ang mga pagpasiugda sa mga kandidato sa ilahang mga pagpanganpanya ug malaumon nga kini magpadayon hangtud sa muabot ang adlaw sa piniliay.
Dugang sa opisyal nga wala silay natala nga mga barangay sa syudad sa Sugbo nga ma-klasipikar isip ‘areas of immediate concern’.
