CEBU CITY-Gikatakdang itukod tulo ka tuig gikan karun ang usa ka dako nga pasilidad sa Waste-To-Energy (WTE) sa dakbayan sa Sugbo nga gipanglantawang makasulbad sa mga problema sa kinaiyahan nga dala sa bag-o lang gisirhan nga Inayawan landfill.
Gumikan sa 900-toneladang kapasidad niini, ang maong pasilidad makahimo sa pag-produce og 18 megawatts ug makahatag og elektrisidad alang sa labing menos 30,000 ngadto sa 40,000 ka mga panimalay sa higayon nga magamit na.
Ang nagpasiugda sa proyekto nga mao ang New Sky Energy nakakita na og 6 ka ektarya nga lote sa bukirang barangay sa dakbayan sa Sugbo, kung diin itukod ang nahisgutang pasilidad.
Matud pa ni Konsehal Joel Garganera nga anaa na sila karon sa final stage sa lot procurement ug nagproseso pa sila og permit gikan sa Department of Environment and Natural Resources (DENR), Department of Energy (DOE) ug ubang stakeholders.
Nakig-alayon usab sila sa National Grid Corporation of the Philippines (NGCP) ug sa Visayan Electric company.
