Gipanghimakak ni Senate President Pro Tempore Panfilo Lacson ang hungihong sa pagbag-o sa liderato sa Senado.
Matod sa Senador, dili tinuod ang maong hungihong ug usa na ka karaan nga taktika sa saywar nga gibuhi pag-usab.
Giingong tumong sa mga nagpakaylap sa hungihong mao ang paghimo og kalibog ug pagpugas og intriga sa mga sakop sa majority.
Reaksyon kini sa Senador sa hisgutanan nga ubay-ubay sa iyang mga kaubang senador ang midapig ug misuporta kang Senate Minority Leader Alan Cayetano aron mahimong sunod nga Senate President.
Kahinumduman nga niadtong miaging buwan lang gihulip ni Senador Tito Sotto si Senador Chiz Escudero isip Senate President gumikan sa hungihong nga giingong nakadawat siya og campaign donation gikan sa kontraktor nga nalambigit sa mga anomaliya sa flood control project.
