Subling nagkainitay sa plenaryo sa Senado sila si Senador Panfilo Lacson ug Senador Rodante Marcoleta human gisaway ni Marcoleta ang kakulang sa opisyal nga report sa komite hangtod karon, nunot sa sunod-sunod nga mga hearing sa Senate Blue Ribbon Committee bahin sa mga anomaliya sa mga flood control project sa nasud.
Sumala ni Lacson, ang matag senador gihatagan og inisyal nga report, diin ang matag usa adunay kaugalingong kopya nga adunay watermark sa ilang tagsa-tagsa ka opisina. Giingong gibuhat kini sa iyang opisina aron malikayan ang pag-leak sa inisyal nga report sa komite kaniadto.
Sa laing bahin, si Marcoleta miingon nga ang report sa komite ni Lacson adunay daghang mga kakulangan, labi na ang pagkawala sa mga importanteng ngalan sama ni Adrian Bersamin, kinsa kaniadto nagsilbi nga Undersecretary ug pangu sa Presidential Legislative Liaison Office (PLLO).
Gihisgutan usab ni Sen. Marcoleta ang iyang giingon nga pag-insister sa iyang mga kaubang senador sama ni Sen. Panfilo Lacson nga siya usa ka pro-China.
Sa tinubagay nila ni Lacson ug Marcoleta, si Marcoleta miingon nga motawag siya og hearing sa Marso 12 bahin sa isyu sa West Philippine Sea ug sa utlanan sa teritoryo sa Pilipinas nga gilalisan nga katubigan.
Lakip sa mga giimbitar mao ang mga representante sa National Mapping and Resource Information Authority (NAMRIA), Philippine Coast Guard, Philippine Navy, ug uban pang dagkong personalidad sama ni kanhi Justice Antonio Carpio, ug uban pa.
Sa dihang gipangutana ni Lacson si Senate Committee on Foreign Relations Chair Erwin Tulfo, si Tulfo miingon nga ang mga giimbitar nga ahensya ug personalidad dili makatambong.
Tungod niini, giinsistir ni Lacson nga ‘gikumpirma ni Marcoleta ang usa ka butang nga wala pa makumpirma’.
