CEBU CITY-Temporaryong sirad-an ang bahin sa northbound lane sa Osmeña Boulevard sa dakbayan sa Sugbo sulod sa 20 ka adlaw gikan Oktubre 2 hangtod 22, 2023.
Gianunsyo sa Cebu City Transportation Office (CCTO) sa milabay nga Sabado sa gabii, Septiyembre 30, ang pagsira sa karsada gikan sa eskina sa N. Escario Street paingon sa eskina sa J. Avila Street isip kabahin sa padayong konstruksyon sa Capitol bus station alang sa Bus Rapid Transit (BRT).
Ang CCTO nagkanayon sa ilang advisory sa ilahang social media account nga ilahang ipatuman ang diversion routes alang sa northbound public utility jeepneys (PUJs) ug pribadong mga sakyanan.
Sa pikas bahin, ipabilin nila ang kasamtangang diversion route alang sa southbound PUJs paingon sa Fuente Osmeña.
Alang sa mga PUJ nga mopaingon sa Barangay Apas (o sa IT Park) ug Lahug, inig-abot nila sa Osmeña Boulevard, moliko sila sa tuo paingon sa MP Yap Street, dayon moliko sa wala paingon sa Juana Osmeña Street, ug moliko sa tuo paingon sa N. Escario street.
Sa laing bahin, alang sa mga PUJ nga paingon sa Oprra, sa higayon nga molahos na sila sa Osmeña Boulevard, moliko sila sa tuo sa MP Yap Street, dayon liko sa wala sa dalan Juana Osmeña, dayun mu-left turn sa dalan N. Escario, dayon liko sa tuo paingon sa Villalon Drive.
Alang sa mga PUJ nga paingon sa Barangay Guadalupe ug Banawa, gikan sa Osmeña Boulevard, moliko sila sa J. Avila Street, dayon moliko sa M. Cui Street, dayon moliko sa tuo sa N. Escario Street, dayon moliko sa G. Garcia Street, ug sa kataposan, laing left turn sa M. Velez Street.
Samtang alang sa mga probadong sakyanan, paingon sa Barangay Apas o sa IT Park ug Lahug, kinahanglang molahos sila sa Osmeña Boulevard, dayon moliko sa tuo sa dalan J. Avila, ug moliko sa wala sa F. Ramos Extension, ug sa kataposan, moliko sa tuo sa dalan N. Escario.
Sa laing bahin, sa mga mopaingon sa Oprra, sa higayon nga molahos na sila sa Osmeña Boulevard, moliko sila sa tuo sa dalan J. Avila, ug moliko sa wala sa F. Ramos Extension, mopadayon sa Villalon Drive.
Samtang, kadtong mga pribadong sakyanan nga mopaingon sa Barangay Guadalupe ug Banawa, inig-abot nila sa Osmeña Boulevard, moliko sila sa wala paingon sa J. Avila Street, dayon moliko sa M. Cui Street, sunod sa N. Escario Street, dayon muhimo og left turn sa G. Garcia Street, ug kataposan, laing left turn paingon sa M. Velez Street.
Kahinumduman nga sa milabay nga Setyembre 22, mi-anunsyo ang CCTO sa 20-day road closure sa southbound lane sa Osmeña Boulevard sukad sa milabay nga Setyembre 24 hangtud Oktubre 14.
