Lauman gihapon ang pagsaka sa presyo sa mga produktong petrolyo sa sunod semana, sumala sa Department of Energy (DOE).
Kini nahitabo taliwala sa padayon nga kawalay kasiguruhan sa merkado sa kalibutan tungod sa pagbabag sa Iran sa mga bahin sa Strait of Hormuz, usa ka kritikal nga agianan alang sa one-fifth sa suplay sa lana sa kalibutan.
Sumala ni Energy Secretary Sharon Garin, posible nga aduna gihapoy pagsaka sa presyo sa mga produktong petrolyo tungod kay ang presyo sa lana sa merkado sa kalibutan wala pa gihapon mokalma.
Ingon man nga gipasalig sa kalihim nga ang nasud adunay igong suplay hangtod sa 50 ka adlaw ug ang bugtong isyu mao ang presyo sa mga produktong petrolyo.
Dugang pa niini nga nagmando na ang gobyerno sa mga kompanya sa lana nga magpadayon sa pag-order sa mga produktong petrolyo bisan pa sa pagsaka sa presyo, ug nakigsulti usab sila sa ubang mga nasud sa Asya aron masiguro nga ang Pilipinas dili mahutdan og suplay.
Nipasalig usab si Garin nga ang nasud adunay daghang mga kapilian o alternatibo aron makakuha og suplay sa lana.
Sa samang higayon, giawhag sa kalihim ang publiko nga makadaginot sa paggamit sa kuryente aron mabalanse ang panginahanglan sa mga produktong petrolyo ug gitambagan usab ang publiko nga dili magtipig og mga produktong petrolyo sa balay tungod kay dili kini luwas.
Sa bahin sa gobyerno, si Presidente Ferdinand Marcos Jr. kaniadto nagmando sa mga ahensya nga mosagop og upat ka adlaw nga trabaho sa semana aron makunhuran ang konsumo ug gasto sa kuryente ug lana.
