CENTRAL VISAYAS-Duha lang ka semana human sa dakong kapildihan sa Bohol, ang CPP-NPA nakaagom na usab og laing dakong kapildihan samtang nagpadayon ang walay hunong nga nakatutok nga mga operasyon militar sa mga tropa sa gobyerno sa rehiyon sa Kabisay-an.
Hinungdan nga laing unom ka terorista sa NPA ang napatay sa mga sakop sa 47th Infantry Battalion ubos sa 302nd Infantry Brigade sa Joint Task Force (JTF) Spear, human ang armadong engkwentro sa Brgy Tabugon, Kabankalan City sa Negros Occidental niadtong Huwebes sa gabii, Setyembre 21.
Ang na-neutralize nga mga terorista sa NPA mga salin sa huyang nga South West Front (SWF) ubos sa Komiteng Rehiyon Negros, Cebu, Bohol, ug Siquijor (KR NCBS).
Human sa engkwentro, narekober sa tropa ang daghang kagamitan sa gubat lakip ang upat (4) ka Cal. 45 Pistol; usa (1) ka Cal. 38 Pistol; usa (1) ka Hand Grenade; daghang magasin; ug mga buhing bala sa Cal. 45 ug Cal. 38 Pistol; walo ka mga mobile phone; ug personal nga mga butang.
Ang engkwentro resulta sa impormasyon nga gihatag sa mga residente sa komunidad sa presensya sa mga terorista sa NPA nga nagpahigayon og extortion activities ug nagplano sa pag-liquidate sa mga personnel sa AFP nga nagpahigayon og Community Support Programs (CSP) sa lugar.
Subay niini, midayeg si Lieutenant General Benedict M Arevalo PA, ang Commander sa Visayas Command sa mga tropa sa ilang walay puas nga paningkamot ug makanunayon nga pasalig.
Dugang pa, nga ang serye sa mga kapakyasan nga nahiagoman sa teroristang grupo maoy pagpakita nga padayon silang nawad-an sa ilang pagkupot sa katawhan sa rehiyon, tungod kay padayong napakyas ang ilang mga paningkamot sa pagbawi.
Kahinumduman nga ang unang serye sa dagkong mga kapakyasan nahitabo niadtong Septiyembre 07, diin unom (6) ka mga terorista sa NPA lakip ang banggiitang IP organizer, nga si Kerlan Fanagel ang napatay sa engkwentro sa mga sakop sa 47th Infantry Battalion sa Bilar, Bohol.
Sa pikas bahin, padayun nga giawhag ang pipila nga nahabilin nga mga terorista sa NPA sa rehiyon nga mobalik sa sakup sa balaod samtang naa pa silay higayon.
