Cebu City– Balik prisuhan ang usa ka lalaki human niini gisulayan sa pagpalusot ang mga pakete sa sigarilyo ug shabu sulod sa Operation Second Chance sa Cebu City Jail Compound.
Nakit-an sa sa cctv camera nga nagkatkat sa pader sa rehabilitation center nga gidumala sa cebu city government si Rimer Jay Fajardo, 18 anyos ug residente sa Brgy Basak San Nicholas , dakbayan sa Sugbo dala ang usa ka bag nga maoy gisudlan sa kontrabando.
Nasayran nga sweto na kaayo ang suspek sa pag katkat sa pader sa rehabilitation center sanglit diha man kini gikan human nakasuhan og frustrated murder niadtong nakalabayng tuig diin menor de edad pa kini ug niadtong setyembre 3 lamang kini nakagawas sa maong facility.
Matud ni Fajardo nga unang higayon pa lamang niini nabuhat ang pagkatkat sa pasilidad bugti sa 7,000 pesos. Gihimakak usab niini ang dunay pakete sa drogas nga gisulod da pakete sa mga sigarilyo. Nagdumili usab kini sa pagtug-an kung si kinsa ang misugo kaniya.
Gipa imbestigahan na ni Cebu City Councilor Dave Tumulak ang bag ong modus sa illegal drug smuggling sa Operation Second Chance ug sa Cebu City Jail mismo. Dako ang pahgtuo ni Tumulak nga ang mga drogas nga nasakmit sa Cebu City Jail ang gipaagi sa rehabilitation center nga atbang lamang sa male dormitory sa maong prisuhan.
