Gikalot sa usa ka lalaki sa India ang patay’ng lawas sa iyang igsuon nga babaye ug gidala kini sa bangko aron pamatud-an nga patay na ang tag-iya sa account human siya mabalibaran sa pag-withdraw tungod sa kakulang sa death certificate.
Ang lalaki nga si Jitu Munda, gikan sa tribal community sa Odisha State, midangop sa opisina sa Indian Overseas Bank aron kuhaon unta ang kwarta sa account sa iyang namatay nga igsoon.
Sumala pa sa bangko, wala tugoti ang withdrawal tungod kay dili mahimo ang third-party transaction nga walay hustong legal nga dokumento ug awtorisasyon.
Dugang pa niini, tungod sa kasuko, mibalik si Munda dala ang nahukay nga patayng lawas sa iyang igsoon nga gilubong pipila pa lamang ka adlaw ang milabay, nga maoy hinungdan sa dakong kakulba sa mga tawo sulod sa bangko.
Subay sa pahayag sa bangko, ang insidente resulta sa kakulang sa kahibalo bahin sa proseso sa pag-claim sa pondo, apan gisaad nga prayoridad nga maproseso ang claim kon masumiter na ang death certificate.
Sa pagkakaron, ang maong talagsaong panghitabo naghatagog pagtagad sa padayon nga problema sa kakulang sa legal nga dokumentasyon ilabina sa mga rural nga komunidad sa India.
