CEBU CITY — Giimbestigaran sa PNP ang kamatayon sa usa ka lalaki human gipusil sa iyang silingan sa Sitio Sunshine Valley, Quiot Pardo, sa dakbayan sa Sugbo.
‘Dead on the spot’ ang biktimang si Vladimir Alatraca, alyas Pylux, gibana-banang anaa sa 30 anyos ang pangidaron niini, adunay duha ka mga anak, ug residente sa maong lugar.
Base sa mga nakakita niini, gipusil si Alatraca sa iyang silingan human mihatod sa iyang anak sa tunghaan.
Emosyonal nga gisaysay sa asawa nga si Lesley Flor Cabaluna na naglalis sa milabay’ng adlaw silang Alatraca ug ang gitudlong suspek sa pagpamusil nga si Jersam Armesim tungod lang sa naka-park nga sakyanan atubangan sa ilang panimalay.
Nasayran nga gipanag-iya ang maong sakyanan mao si alyas Junjun Romillosa, ang sister-in-law ni Cabaluna.
Matud ni Cabaluna nga gusto niyang badlungon si Armesim apan nahadlok kini tungod sa pagka-isog niini ilabi na nga nalakip kini sa usa ka brotherhood group nga gitawag og Guardians.
Nagdanguyngoy na lang si Cabaluna sa gisangputan sa iyang bana ug nanghinaut kini nga, matud pa, madugta sa prisuhan ang suspek.
Nagpakisayud pa ang SOCO team kung unsa ang motibo sa maong krimen samtang nabalhog na sa detention cell sa Labangon Police Station si Armesim human kini mitahan sa kapulisan.
