CEBU CITY – Gipusil patay ang usa ka lalaki kagabie sa Alaska Mambaling, dakbayan sa Sugbo.
Giila ang biktima nga si Reynaldo Baydal, 48 anyos, sabongero ug nanimuyo ra usab sa nahisgutang dapit.
Matud pa nga nag-inom samtang nagvideoke ang biktima kauban sa mga barkada niini sa usa ka tindahan.
Ug sa dihang kalit lang nga gipusil kini sa wala pa mailhi nga suspetsado.
Gika-ingun nga naglakaw ra ang suspek padulong sa giinuman sa maong grupo ug kalit nga namusil.
Apan wala na makit-i ang nawng niini gumikan nga paspas man kini nga mi-ariya human mamusil.
Basi sa nadungog nga buto sa mga residente, gituohan nga gikaduhaan ug pusil sa suspetsado ang maong biktima hinungdan sa hinanali nga kamatayun niini.
Samtang, nagkanayon usab ang usa sa kaubanan sa inom sa maong biktima nga wala na sila makahigayun ug tan-aw sa kung si kinsa ang namusil sanglit nibarog naman sila ug mipalayo gumikan sa kahadlok nga maapil.
Nasayran nga walay kaaway ang maong biktima sa maong dapit gumikan nga hinamego man kini nga pagkaklase sa tawo.
Sa pagkakaron, padayun pa ang imbestigasyon kabahin sa motibo sa pagpusil patay sa biktima.
