BLANGKO ang kapulisan sa nahitabong pagpamusil-patay sa usa ka lalaki kinsang natulog lang sa lantay sa Sitio Tarnte, Brgy. Ibabao, sa dakbayan sa Mandaue.
Dead on the spot ang biktimang si Alan Liquin, alyas Ladlad, 38 anyos, human kini gipusil sa wala mailhing mamumuno sa miaging kaadlawon.
Matud ni Police Corporal Wendell Navasquez sa Mandaue City Police Station nga natulog lang sa gawas si Liquin hangtud nga kalit lang miduol kaniya ang gunman.
Mibunlot og kalibre .45 nga armas ang maong gunman dayon og pusil sa makatulo nga higayon ngadto sa biktima.
Miikyas ang wala mailhing mamumuno human nabuhat ang maong krimen.
Narekober sa kapulisan ang tulo ka kabhang sa kalibre .45 nga armas ug usa ka deformed slug gikan sa crime scene.
Padayong gisusi sa kapulisan ang motibo sa kamatayon sa lalaki.
