CEBU CITY-Nasikop ang 54-anyos nga lalaki human gipusil niini sa liog ang iyang silingan sa Argao, habagatang bahin sa Sugbo.
Giila sa kapulisan sa Argao ang dinakpan nga si Florentino Valdez Caminade Jr., taga Sitio Mingay, Barangay Bulasa, lungsod sa Argao.
Samtang ang biktima si Charlito Naces, 42-anyos nga silingan sa suspek.
Base sa imbistigasyon sa kapulisan nga sa wala pa nahitabo ang pagpamusil, aduna na’y panaglalis ang duha niadtong adlaw nga Miyerlukes nga misangpot sa pag-away.
Nasayran nganagpatunga pa ang mga barangay tanod sa duha apan, wala nagpapugong ang suspek gani, mibalik kini sa balay sa biktima ug gihagit nga mogawas si Charlito.
Ingon man nga migawas ang biktima ug gipabuthan og upat ka higayon hinungdan nga dali nga nanagan ang mga sakop sa pamilya sa biktima ug naigo kini sa walang bahin sa iyang liog.
Sa pagkakaron, anaa na sa Argao Municipal Police Station ang suspek diin mag-atubang kini sa kasong frustrated murder samtang ang biktima anaa sa maayo nga kahimtang ug nagpadayon sa pagpaayo sa nanagkong samad sa tambalanan.
