CEBU – Naa sa luwas na nga kahimtang ang lalaki nga girakrakan sulod sa Mactan Doctors hospital kagahapon adlawa sa may Brgy Basak Dakbayan sa Lapu-Lapu.
Giila ang biktima nga si Junide Makasalom Daligdig 56 anyos ug residente sa Brgy. Basak Iba sa naasoy nga dakbayan.
Matud ni PO1 Marian Iyas ang imbestigador sa maong panghitabo nga ang biktima nagsakay sa iyang sakyanan sa may iskina dool sa naasoy nga tambalanan sa dihang gipusil kini sa wala pa matinong mamuno.
Naigo na matud pa ang biktima hinungdan nga midiritso nalang kini og sulod sa tambalanan apan gigukod pa kini sa mga mamumuno nga sakay sa 3 ka motorsiklo og didto girakrakan sulod sa ospital.
Wala usab matud pa nakapabuto ang security guard sa maong ospital sanglit puro na sila nangahadlok.
Naka-angkon ug igo sa walang bahin sa nawng ang biktima, usa sa may liog ug usa sa may too nga bahin sa iyang likod.
Stable na hinoon ang kahimtang niini ug gibalhin na sa laing pribadong hospital sa dakbayan sa Sugbo.
Padayon pa karong gisuta sa mga PNP ang motibo sa pagpatay sanglit matud sa pamilya sa biktima nga wala man kini naka-away ug wala man usab nadawat nga death threat.
Padayon pa usab nga gisuta kung kinsa ang mga mamumuno sanglit walay plate number ang mga motor niini ug wala usab nakuha nga footage sa CCTV.
Wala ra hinooy naangol nga mga pasyente og ingon man staff sa ospital diin nahitabo ang pagpamusil.
