CEBU CITY-Napalgang nagbitay ang usa ka lalaki, gamit ang pisi nga naghigot sa iyang liog sulod sa iyang giabangang boarding house alas 3 sa hapon, Abril 2 sa Sitio Tubod, Barangay. Buhisan, dakbayan sa Sugbo.
Giila ang lalaki nga si Johanes Carcueva Piñosa, anaa sa 30 kapin ang pangidaron nga giingong lumad nga taga lungsod sa Dumajug.
Matud sa nakakita sa biktima nga si Ruel Ordeñza, 41-anyos, usa ka security guard sa usa ka dakong mall sa dakbayan sa Sugbo, nga alas 8 sa buntag, gilili niya ang maong biktima apan wala lang kini niya panumbalinga sa pagtuo nga naghinanok lang kini.
Apan, pagtungtong sa alas 3 sa hapon, nagduda na si Ordeñeza gumikan wala na mogawas sa kwarto si Piñosa hinungdan nga subling gilili niini ang kwarto ug dakong kakurat niya nga nagbitay na kini sulod sa lawak.
Daling nagpatabang si Ordeñeza sa ilang mga silingan ug nanawag sa Barangay gumikan sa iyang nakitang patayng lawas.
Gipaambit usab ni Ordeñeza nga sa milabayang unom ka buwan niining panag-uban sa boarding house naka hisgot ang biktima nga mipalayo kini sa iyang asawa gumikan sa iyang nakita nga adunay laing lalaki.
Sa pagkakaron, gipalawman na sa Labangon Pulis ang imbistigasyon kung aduna ba’y nahitabong foul play sa kamatayon ni Piñosa. | BOMBO REXMOND OMEGA
