Napalgang patay ang usa ka lalaki sa sulod sa usa ka pension house kagahapon sa Caimito St., Brgy. Mambaling, sa dakbayan sa Sugbo.
Giila ang biktima nga si James Eric Adolfo, 46 anyos, ug residente sa Poblacion, Ormoc City.
Base sa inisyal nga imbestigasyon, nanawag ang receptionist sa room nga gipuy-an sa maong lalaki aron unta mo-check out.
Gumikan sa kadugay sa pagsanong, gipugos nila og abli ang pultahan sa maong kwarto ug naabtan nila nga half-naked si Adolfo ug wala nay kinabuhi.
Matud ni Police Senior Master Sergeant Raquel Camay sa Mambaling PNP nga walay samad ang lawas sa biktima ug walay gamit nga nabungkag gikan sa gipuy-ang kwarto.
Dugang pa niini nga gibutyag sa ig-agaw nga nag-agi ang biktima og atake.
Tungod niini, gipaabot pa sa kapulisan ang autopsy report aron sayron kung unsa man ang hinungdan sa kamatayon sa biktima.
