CEBU CITY — Giimbestigaran pa sa Talisay City Police Station ang pagkamatay sa usa ka lalaki kinsang giingong gi-salvage sa Brgy. Lagtang sa dakbayan sa Talisay.
Giila sa mga kabanay ang biktima nga si Jimbo Gadiano, 33 anyos, ug nagpuyo sa Sitio Crasher, Brgy. Lawaan 3, sa susamang dakbayan.
Matud sa lider sa SOCO team sa Talisay City PNP nga si Lieutenant Colonel David Alexander Patriana nga napalgang patay ang maong biktima sa awa-aw nga dapit sa Brgy. Lagtang diin nag-ubu kini ug gihiktan ang iyang kamot og itom nga liston sa sapatos.
Nakahiagum og nagkalain-laing samad-pinusilan si Gadiano sa iyang lawas nga miresulta sa iyang hinanaling kamatayon.
Dugang pa ni Patriana nga nakarekober sila og upat ka kabhang sa kalibre 45 nga armas ug posible usab nga naigo ang ulo sa biktima.
Gihulagway sa igsuon niini nga si Jay-R Gadiano nga buotan ang biktima apan wala kini nakamatikod sa iyang kahimtang.
Dugang pa niini nga walay gika-engkwentro ang iyang igsuon ug giuyunan usab sa kapuyo niini.
Kasamtangang gi-background check sa Talisay City PNP ang biktima samtang ila usab nga gisuta ang motibo niini.
Nagbangutan si Rosemarie Ramirez, ang kapikas sa biktima ug nagkanayon nga tungod lang sa kasuya ang nahitabo.
Matud ni Ramirez, kinsang adunay tulo ka mga anak, nga tiggamitan og ginadiling drugas kaniadto ang iyang kapikas apan nagbag-o na kini ug wala na nagbisyo human sa usa na ka tuig nilang pagpuyo.
Wala hinuon nakamatikod ang kapuyo nga milakaw ang biktima nianang panahona.
Dugang pa ni Ramirez nga nakabantay kini kung kinsa man ang nasuya sa iyang kapuyo apan wala una niya gibutyag kung kinsa man.
Gusto usab nga masuta sa amahan nga si Gomer Gadiano kung kinsa man ang responsable sa pagpatay sa iyang anak.
