Lalaki nga giingong ‘gunman’ sa sunod-sunod nga pagpamusil sa dakbayan sa Talisay, nakaangkon og samad-pinusilan atol sa engkwentro sa kapulisan

TALISAY CITY, CEBU-Nakaangkon og samad-pinusilan ang lalaking gituohang nagpaluyo sa sunod-sunod nga pagpamusil sa dakbayan sa Talisay atol sa engkwentro sa kapulisan sa Talisay City Police Station sa Purok Camanchili, Barangay Candulawan, dakbayan sa Talisay, Cebu niadtong Huwebes sa hapon, Mayo 23, 2024.

Giila kini nga si Albert Padayao o mas nailhan nga “Perot,” residente sa maong dapit ug nakaangkon og samad-pinusilan sa iyang lawas human kini nagbinayloay og bala sa kapulisan.

Nasakmit sa mga otoridad ang usa ka kalibre .45 nga pistola nga adunay magazine, usa ka kalibre .380 nga armas nga adunay nagkadaiyang mga bala, ug 12.35 gramos nga gituohang shabu nga nagkantidad og P83,980.