(Update)CEBU CITY- Gikompirmar sa Clarin PNP nga dili sakop sa Abu Sayyaf ang lalaki nga nasikop kaganihang udto sa mga sundalo sa Sitio Red Land Brgy. Bacani lungsod sa Clarin tungod kay na-aan kini nga nga miyembro sa Abu Sayyaf Group kun ASG.
Sa pakighinabi sa Bombo Radyo Cebu kang PO2 Genesis Peizas sa Clarin Police Station, iyang giingon nga usa ka tao nga may deperensiya sa panghuna-huna ang nasikop nga mga sundalo ug dili miyembro sa mga rebeldeng grupo.
Matud ni Peizas nga na-aan lang ang maong lalaki nga usa ka Abu Sayyaf tungod kay giingong naglaroy-laroy lang kini ug dili masabtan ang sinulti-an niini.Dugang pa ni Piezas nga tungod sa kabaho ug taas nga bungot niini mao nga na-aan kini nga miyembro sa ASG.
Gitino usab ni Piezas nga layo ra ang hitsura niini sa Abu Sayyaf nga si alyas Richard ug ang bugtong pareho lang niini sa maong rebelde mao ang ilang kaniwangon.
Matud usab ni Peizas nga nasiguro nila nga dili miyembro sa ASG ang maong lalaki tungod kay kamao man kini magbinisaya ug suheto pa sa mga pangalan sa mga barangay sa ilang lungsod.
Nasayran nga nagpuyo ang maong lalaki sa lungsod sa Catigbian, ang kasikbit sa Clarin ug giingong aduna usab nakaila niini nga didto gyud kini nagpuyo.
Sa karon gi-turn over na sa mga pulis ang nasikop nga lalaki sa iyang pinuy-anan ug padayon pa sila nga pagbantay sa palibot aron nga masikop ang lain pang nahabilin nga Abu Sayyaf nga nagtago-tago pa gihapon hangtud karon sa Clarin Bohol.
