LILOAN,CEBU- Mag-atubang karon ang usa ka lalaki sa kasong Attempted robbery with intimidation sa Liloan Municipal Police Station human kini nisulod sa laing balay ug gitulis ang tag-iya niini sa Purok Limogmog, Sitio Curva 2, Brgy San Vicente, Liloan, Cebu.
Nakaangkon og samad sa nawong ang suspek human misuway sa pagpanulis nga nag-inusara, apan nadakpan ug gikulata sa mga residente sa maong dapit.
Giila ang tulisan nga si Antonio Masayon Carballo, 28 anyos, residente sa Lanao Del Sur, construction worker.
Ang biktima ug tag-iya sa balay mao si Raquel Rodriguez Janzon, 38, ug kanhi residente sa Mati City Davao Oriental, kinsa kasamtangang nagpuyo sa nahisgutang lugar.
Matud sa biktima, nikalit og sulod ang maong suspek sa iyahang balay samtang natulog siya sa kwarto og gani giti-onan siya og kutsilyo nga adunay gitas-on nga 13.5 pulgada.
Subay niini, dali kining naulian sa panimuot, ug maisog nga nakig-away sa suspek ug giilog ang kutsilyo samtang daling nangayo og tabang sa mga silingan.
Sa maong hitabo, misuway pag-ikyas ang suspek apan naabtan kini sa mga silingan hinungdan nga gikulata ang suspek nga giingong nagtama.
Daling naka responde usab ang mga tanod sa Barangay nga sila si Richie Arcelo, Josephus Baguio, og Lea Lahoy dalib.
Kasamtangang gitanggong sa Liloan Municipal Police Station ang suspek aron mag-atubang og daghang kaso.|Bombo Rocky Lavarez
