CEBU CITY- Nasikop sa mga sakop sa Mambaling Police Station ang usa ka lalaki nga naglabay og bato sa balay sa iyang silingan sa Sitio Lusimba, Barangay Basak San Nicolas, dakbayan sa Sugbo, niadtong Lunes, Marso 17, 2025.
Giila ang suspek nga si Kenneth Dejito Takkedo, 35, residente sa maong dapit.
Base sa inisyal nga imbestigasyon, nasuko ang suspek sa reklamante nga si alyas Fatima, 44, tungod sa away sa yuta.
Nasuta nga samtang nag-inom ang reklamante uban sa mga higala, kalit silang giataki sa suspek sa makatulo ka higayon diin ang kataposang insidente nakuhaan og video.
Sa pikas bahin, nahimong emosyonal asawa sa suspek nga si Dyesebel Valle, atol sa pakighinabi sa Bombo Newsteam nibuhagay ang iyahang mga luha human iyahang nasayran ganinang buntag ang panghitabo nga anaa na sa prisohan ang iyang bana.
Gisaysay usab niini, nga pagkakita niya sa post sa social media sa nabuhat sa iyang bana dali dayon siyang nianhi sa Mambaling Police Station, aron susihon ang iyang bana.
Gidugang pa niini, nga gikan siya sa Badian kay didto siya kasamtangan nipuyo kuyog sa ilang lima ka gagmay nga mga anak kay matud pa didto kini nag skwela.
Dili masabot ang gibati sa asawa karun, gumikan kay grabi iyang kaguol kung kinsa nalang ang mubohi ug mupakaon sa ilang lima ka gagmayng mga anak kung ipa-preso ang iyahang bana.
Hinungdan, nga nihangyo si Dyesebel sa biktima nga unta dili nalang ipa-priso ang iyang bana ug malooy kini sa ilahang lima ka gagmay nga mga anak.(With reports of Bombo Koky Cabatingan)
