CEBU CITY – Sikop ang usa ka 21-anyos nga lalaki human kini mi-post sa iyahang social media account sa baligya niini nga shabu.
Gipaubos sa buybust operation sa kapulisan sa Abellana Police Station ang subject nga si John Angel Bantilo, ug residente sa Sitio Kalubihan, Brgy Sambag 2 syudad sa Sugbo human nasakpan nga naka-post sa iyahang Facebook account ang naka “sale” niini nga shabu.
Base sa iyahang post, tag-250 pesos na lang ang baligya niini sa usa ka gamay nga pakete.
Gawas niini, nahimong subject na usab si Bantilo sa reklamo nga nadawat sa “Itug-an ni CD” program sa Cebu City Police Office gumikan sa kalambigitan niini sa iligal nga drugas.
Apan hugtanong gihimakak sa dinakpan ang pasangil ug matud pa nga na-hack ang iyahang Facebook account ug gitudlo niini ang ex-girlfriend nga maoy mibuhat sa ingon. Giangkon hinuon niini nga mugamit kini ug iligal nga drugas.
Napalitan og usa ka gamay’ng pakete sa shabu si Bantilo atol sa maong operasyon.
Kasong kalapasan sa Republic Act 9165 kon Comprehensive Dangerous Drugs Act ang kasong ipasaka niini.
