CEBU CITY-Napalgang wala nay kinabuhi ug gilabay sa karaang septic tank sa tudela, padayun pa nga gi-imbistigahan sa kapulisan sa Tudela Municipal Police Station.
Gibutyag ni Police Captain Leovil E. Singson, ang hepe sa kapulisan sa Tudela Municipal Police Station, sa pakighinabi sa Bombo News Team, nga siyam na ka adlaw sukad nawala ang maong biktima.
Gituohan nga gitabangan sa pagpatay ug gilabay sa karaang septic tank ug gitabonan sa semento ang biktima nga si Marlon Belarmino, taga Brgy Villahermosa, Tudela, Camotes Islands, Cebu, kinsa maoy nag-atiman sa kalubihan.
Gitataw sa kapulsian nga adunay tulo ka mga “persons of interest” nga ilahang padayun nga gisuta sa ilahang gipahigayon nga imbestigasyon aron masulbad ug mailhan ang mga mamumuno.
Dugang sa opisyal nga nakig-inom ang biktima sa wala pa kini gikataho nga nawala hinungdan nga ilang giimbitar ang mga lalaki nga katapusang nakit-an nga uban niini.
Usa usab sa ilahang gilantaw nga anggulo ang taho sa magulang sa biktima nga adunay nakasumapaki nga usa ka indibidwal ang biktima, butang nga ilaha usab kini nga giimbitar arun sa pagpangutana.
