CEBU CITY-Napusasan sa mga sakop sa kapulisan sa Inayawan Police Station 7 ang 26-anyos nga lalaki kinsang naungo sa scatter human mangawat og kwarta nga nagkantidad og P2,500 sa iyang kaugalingong uyoan.
Gisaysay sa biktima nga samtang natulog kini sa iyang balay nga gipuy-an sa Sitio Lower Tabucanal, Barangay Poblacion Pardo, ning dakbayan sa Sugbo nga nakamata kini atol sa pagkuha sa kwarta apan, wala lang niya kini nadakpan tungod dali kining nisibat.
Apan, wala gihapon nakaipsot ang maong suspek tungod nakaila ang iyang uyoan.
Nasayran usab nga dili lang kini ang unang higayon nga nangawat ang suspek tungod matud sa biktima nga ikatulo na kini ka higayon.
Hinungdan nga desidedo ang uyoan nga pasakaan kini og kaso.
Ingon man sa habig sa suspek nga iya raman untang iuli ang kwarta nga iyang gikuha kon makadaog kini sa online sugal nga scatter apan, napakyas ug napakdot tungod napildi.
