CEBU CITY- Gibunalan ug gipusil sa iyang bukton ang usa ka lalaki nga giingong sige og pangayo sa iyang higala og bahin sa iyang nadaog gikan sa sugal nga “Scatter” pasado alas 3:30 sa kaadlawon niadtong Domingo, Hulyo 19, 2026, sa Sitio Malipayon, Barangay Inayawan, Dakbayan sa Sugbo.
Nailhan ang biktima sa alyas nga si Joey, 33 anyos, ulitawo, ug residente sa lugar. Siya karon gitambalan sa Cebu City Medical Center.
Giila ang suspek, kinsa dali nga nadakpan sa mga pulis nga niresponde, nga si Roma, 28 anyos, ug silingan ra sa biktima.
Sumala sa imbestigasyon sa Inayawan Police Station 7 sa Cebu City Police Office, ang suspek nasuko tungod kay ang biktima giingong sige og pangayo og bahin sa iyang nadaog matag higayon nga sila magkita. Ang suspek gikataho nga nakadaog og ₱500 gikan sa sugal nga “Scatter” sa miaging semana, ug nahibal-an kini sa biktima.
Matod sa mga imbestigador nga matag higayon nga magkita sila, ang biktima giingong mangayo og ₱50 isip “balato” ug masuko kon dili siya hatagan og kwarta.
Giangkon usab sa suspek nga nasuko na siya pag-ayo kay kuhaon pa gani sa biktima ang iyang sigarilyo, tungod niini, niabot sa higayon nga nanulong kini og sinumbagay ug naabut sa panaglalis, nga miresulta sa suspek sa pagbunot og .38-kalibre nga armas ug gipusil ang biktima.
Nakaangkon og samad pinusilan ang biktima sa bukton ug gidala dayon sa tambalanan, diin anaa na sa luwas nga kondisyon.
Atol sa hot pursuit operation, nadakpan sa pulis ang suspek ug nabawi ang armas nga gigamit sa insidente.
Samtang nag-andam na ang mga awtoridad sa pagpasaka og kasong frustrated homicide batok sa suspek sa Inayawan Police Station karong Hulyo 20, 2026.
