CEBU CITY-Gidakop sa gwardya ug gibalhog sa Carbon police station ang usa ka 46 anyos nga lalaki human ni sulay sa pagsunog sa koral sa University of San Jose Recoletos sa dalan P. Lopez, Barangay Kalubihan sa dakbayan sa Sugbo alas 6:00 sa Huwebes sa buntag Abril 4, 2024.
Giila ang gidakop nga si Alejandro Bernardo Langi 46, taga Barangay Dasuloan Lutopan, dakbayan sa Toledo probinsya sa Sugbo.
Personal nga gidala sa Carbon police station ni Security Guard Roberto Calma ang sikyu sa USJR ang suspetsado nga si Langi human ni maaktohi nga gi duslitan ang koral sa tunghaan gamit ang kandila.
Maayo nalang matod sa maong sikyu nga napalong ra ang kalayo ug wala mo katap sa maong edepisyo.
Kasong attempted arson ang ipasaka sa kapulisan sa maong suspetsado ug ilang ipaubos sa background investigation kung duna ba kini laing kaso nga giatubang.
Samtang, wala mohatag og pamahayag ang dinakpan kung unsay iyang motibo sa sulay nga pag sunog sa USJR.
