ARGAO,CEBU- Patay ang usa ka lalaki nga giingung suspek human nakigbinayloay og bala sa kapulisan sa Argao Police Station, sa Barangay Jampang, Lungsod sa Argao,pasado alas 5:00 sa buntag, Septiyembre 13, 2024.
Kini human ang kapulisan sa Argao Police Station pinangulohan ni Police Major Janus Giangan, nagsilbi og Warrant of Arrest sa usa ka lalaki nga ginganlang si Joeraldine Bajenting Gevana alyas ‘Jiraldin’, residente sa nahisgutang lugar tungod sa kalapasan sa Sec. 5 Art II sa RA 9165.
Apan dihang nakita ni Gevana ang nagpadulong nga mga pulis, iyaha hinuon kini nga gipamusil.
Hinungdan, nga nahitabo ang pagbinayloay sa bala tali sa suspek ug mga personahe sa kapolisan.
Gumikan niini ang usa sa mga arresting officer natumba sa yuta samtang ang sakyanan gipusil dapit sa may ‘passenger’s side’.
Ang suspek nidagan paingon sa underground tunnel samtang padayun ang pagpamusil sa mga arresting team.
Mibalos og pusil ang team aron protektahan ang ilang kaugalingon hinungdan nga naigo ang suspek sa iyang lawas nga miresulta sa iyahang pagkahagba.
Daling gidala sa tambalanan ang nasamdan nga suspek, apan gideklarar kini nga ‘Dead on arrival’.
Samtang adunay naangol sa habig sa kapulisan nga giilang si Patrolman Joseph Belarma kinsa padayon nga nagpaalim sa Isidro C. Kintanar Memorial Hospital (ICKMH) sa Brgy. Bogo, Argao Cebu.
Hinuon ang Patrolman, walay grabe nga samad sa iyahang lawas.
