Usa ka dakong lakang paingon sa usa ka “total lifestyle change” ang gihimo sa 49-anyos nga si Skip Boyce sa Utah, U.S.A., human siya nakahukom nga dili mogawas sa iyang kwarto sulod sa 365 ka adlaw o usa ka tuig.
Gisugdan ni Boyce ang iyang gitawag nga “Isolation Year” niadtong Enero 10, 2026, ug gilauman nga mobiya sa Enero 2027.
Sulod sa usa ka tuig, magpabilin siya sa usa ka self-contained nga kwarto sa iyang balay nga kompleto sa banyo, usa ka simpleng kusina, usa ka mini-gym, ug usa ka streaming setup.
Ang tibuok eksperimento gi-livestream 24/7 sa iyang YouTube channel nga “The Isolation Year” para sundon sa publiko. Samtang ang iyang asawa, nga anaa pa gihapon uban kaniya sa balay, nagsilbi nga support system pinaagi sa paghatud sa pagkaon ug mga suplay sa gawas sa pultahan.
Ang pangunang tumong ni Boyce mao ang disiplina ug kahimsog, diin tumong niya nga makunhuran ang iyang timbang gikan sa 315 lbs ngadto sa 205 lbs gamit ang plano sa ehersisyo gikan sa usa ka personal trainer.
Gusto usab niya nga gamiton ang oras sa pagkat-on og bag-ong mga kahanas ug hingpit nga paglikay sa alkohol. Bisan pa man og gipa-checkup niya og maayo sa dili pa magsugod, ang ubang mga eksperto ug netizens nagpasidaan nga ang dugay nga pag-inusara ug kakulang sa sosyal nga interaksyon mahimong adunay negatibo nga epekto sa iyang mental health. Apan, determinado si Boyce nga makompleto ang hagit aron mausab ang iyang kinabuhi.
