CEBU CITY — Gikumpirmar sa Children’s Legal Bureau (CLB) ang pagkasikop sa usa ka lalaki kinsang gituohang nanglugos sa duha ka managsuon sa may Brgy. Talima, isla sa Olango, Lapu-Lapu City.
Nadakpan atol sa manhunt operation sa PNP niadtong Hulyo 16 ang suspek nga si Rassen Tumulak, 42-anyos, ug residente sa Brgy. Poblacion sa susamang dakbayan.
Matud sa tigpamaba sa CLB nga si Atty. King Anthony Perez nga daan nang miisyu og warrant of arrest ang Lapu-Lapu City RTC batok ni Tumulak niadto pang Enero 26, 2015 hinungdan nga gipangita kini sa mga sakop sa kapulisan.
Base sa imbestigasyon, gituohang gilugos ni Tumulak ang duha ka managsuong babaye, kinsang pulos mga menor de edad, sa sulod sa panimalay sa dinakpan.
Dugang pa ni Perez nga namabdos ang usa sa mga biktima sa edad nga 14 anyos tungod lang sa malaw-ay nga binuhatan ni Tumulak.
Anaa na sa kustodiya sa kapulisan ang dinakpan ug mag-atubang og kasong kalapasan sa Anti-Trafficking samtang gipaubos sa Witness Protection Program (WPP) ang duha ka mga biktima.
Gihimug-atan sa CLB nga silotan ang kinsang manghilabot sa katungod ug dignidad sa mga inosenteng batan-on. (with reports by Bombo Joann Gantalao/gn)
