CEBU CITY — Natanggong sa prisuhan ang usa ka lalaki human gituohang nanunggab sa magtiayon gumikan sa tumang kahubog kagahapon sa Brgy. Calaboon, lungsod sa Dumanjug, Cebu.
Samdan ang biktima nga silang Marlon Bani, 34 anyos; ug ang kapikas niining si Elizabeth Bani, 45 anyos, ug puros mga residente sa maong dapit.
Giila sa mga otoridad ang suspek nga si Edmundo Belocura, 54 anyos ug nanimuyo sa susamang barangay.
Base sa imbestigasyon gikan sa Dumanjug Police Station, gi-apas ni Elizabeth ang banang si Marlon human nga nakigtagay kang Belocura.
Pauli-on na unta sa asawa ang bana niini apan nagdumili kini hinungdan nga naglalis sila.
Matud sa hepe sa Dumanjug PNP nga si Police Major Ardioleto Cabagnot nga nasamukan ang magtiayon sa suspek human kini nibabag sa panaglalis.
Gumikan sa kahubog ug tumang kalagot, gi-buak sa suspek ang botelyang walay sulod ngadto sa bana dayon ug dunggab ngadto sa tiyan.
Samtang nagkasamad ang braso sa asawa human giduslak ni Belocura gamit ang maong buak nga botelya ug miikyas kini dayon.
Daling gidala sa tambalanan ang magtiayon gumikan sa naangkong mga samad ug nagpaalim pa kini.
Mag-atubang ang dinakpan og tukmang kasong ipasaka batok kaniya.
