Patay nang napalgan ang usa ka batan-on nga lalaki nga nag-spearfishing sa Borbon, Cebu, gahapong adlawa, Hunyo 24, 2025. Basi sa usa ka post sa kabanay sa biktima, nakapadangat pa kini og mensahe nga mag “quick-dive” kini, apan, wala na kini nabalik niadtong Hunyo 23, 2025.
Ang Municipal Disaster Risk Reduction and Management Office Catmon, PCG Tabogon, ug ubang mga responders, mao na ang nakakaplag sa patayng lawas sa biktima, nga giila sa ngalan nga si Cyrielle, anaa nagpuyo sa Barangay Cadaruhan, Borbon, Cebu.
Sa nahimong pakighinabi sa Bombo Radyo Cebu kang Glen Villas, Head sa Catmon MDRRM, iyahang naasoy nga aduna silay nadawat nga “assistance request” gikan sa MDRRM Borbon, kay pasado alas 4:00 sa hapon, wala nila makit-an ang maong gikatahong patayng lawas.
Busa, nihangyo kini sa ilahang buhatan og search and retrieval team, maong nagmalampuson kini nga nakit-an ang patayng lawas ni Cyrielle nga anaa na sa 100 ft. nga gilawmon.
Dugang ni Villas, ang maong biktima halos kada-adlaw na kini nga mag spearfishing o mamana, diin mga alas 9:00 sa buntag mo-dive na kini, ug mo haw-as mga alas 11:00, apan niadtong tungura, wala na kini mo tunga. | Bombo Irene Ardiente
