PROVINCE OF CEBU- Nagsaulog og valentines day sa prisohan sa Liloan Municipal Police Station ang usa ka 25-anyos nga lalaki kinsang gituohang misulod sa balay sa usa ka konsehal og adunay planong mangawat, apan sikop og wala makaikyas, gahapon Biyernes sa kadlawn, Pebrero 14, 2025.
Giila ang suspek nga si Leonardo Taguran Pansakala, alyas “Leo” 25-anyos, walay trabaho ug lumulupyo sa Purok Kalubian, Barangay Guiwaon sa silingang lungsod sa Compostela sa amihanang Sugbo.
Sa eksklusibong pakighinabi sa Bombo Newsteam kang Police Major Mawi Arcilla, Acting Station Chief sa Liloan Municipal Police Station, nisulod si “Leo” sa gate sa mismong balay sa usa ka konsehal nga walay pananghid.
Dugang pa, nga ang suspek anaa sa sulod sa gate og adunay planong musulod sa maong panimalay, apan pag-uli sa tag-iya kay namatikdan niini nga adunay tawo nga misulod sa ilang gate nga wala nila mailhi.
Dinhi, gisulayan og dakop ang suspek og gipangutana pa sa hingtungdan sa katuyuan niini, apan napakyas sa pagtubag og didto na nagtawag og barangay tanod ug pulis aron ibalhog kini sa prisohan.
Mag-atubang ang dinakpan sa kasong trespassing nunot sa pagsulod niini sa balay sa biktima nga adunay planong mangawat.
Nasuta nga mahitabo kini atol sa concert sa usa ka banda sa maong lungsod isip Pre-Valentines program sa kagamhanang lungsod sa Liloan diin didtong higayona gipanghimuslan sa dinakpan ang higayon kay walay tawo ang mga panimalay.
Subay niini, padayon nga mipahimangno si Police Major Arcilla sa publiko nga buhatong batasan ang pagpaniradong de-kandado sa mga panimalay ilabi na og wala kiniy tawo nga mabilin.(With Reports of Bombo Rocky Lavarez)
