CEBU CITY — Gihimug-atan sa ABC President sa dakbayan sa Lapu-Lapu nga wala kini nanghilabot sa mga aktibidad atol sa kapistahan sa Birhen sa Regla.
Kini ang nahimong pamahayag ni Edi Cuizon subay na sa isyu mahitungod sa giingong pamulitika taliwa sa fiesta.
Matud ni Cuizon nga wala gayud manghilabot ang kampo ni kanhi mayor Paz Radaza sa pagsalmot sa mga aktibidad sa pista gumikan kay nagpakahilom lang kini.
Giklaro usab sa Cuizon, kinsa nga kapitan sa Brgy. Bangkal, nga wala kini mihatag og kamanduan nga dili suportahan sa mga kapitan ang mga aktibidad nga gihan-ay sa City Government.
Kung mahinumduman, wala mitambong ang pipila ka mga kapitan sa Lapu-Lapu City atol sa ilang ABC Night sa nakalabay nga mga gabii diin present si Mayor Junard Ahong Chan.
Hinungdan nga gisaway ni Chan ang ABC President tungod sa giingong pag-boycott.
Gitataw ni Cuizon nga negatibo ang pamahayag sa usa ka tawo kung negatibo ang panglantaw niini.
Apan wala hinuon gitumbok ni Cuizon nga dautan ang panghunahuna ni Chan.
Dugang pa niini nga dili gayud angayang magbasol ang usa ka indibidwal kung unsa man ang gidangatan sa City Government.
Andam usab si Cuizon nga magpakahiubos gumikan kay gipasaylo niya si Chan kung nakabuhat kini og dautan.
Mi-awhag usab kini sa mga oponganon nga dili gayud sila angayang i-judge ug balansehon na lang ang panglantaw sa maong isyu.
