Gipalig-on sa Lapu-Lapu City Government ang kampanya batok sa tuberculosis (TB) pinaagi sa Tuberculosis Implementation Framework Agreement (TIFA) ug Health Commitment Grants, uban sa suporta sa gobyerno sa Estados Unidos ug sa Department of Health (DOH).
Sa iyang welcome remarks atol sa pagbisita ni United States Ambassador to the Philippines Lee Lipton, gipasiugda ni Lapu-Lapu City Mayor Cindy Chan ang papel sa maong mga programa sa pagpalapad sa access sa mga serbisyo sa pag-diagnose ug pagtambal sa TB, ilabi na sa mga komunidad nga lisod maabot ang mga pasilidad sa panglawas.
Pinaagi sa TIFA, gipalig-on ang pagreport sa mga kaso sa TB, contact tracing ug edukasyon sa komunidad aron mapataas ang kahibalo sa publiko ug matubag ang stigma nga nalambigit sa maong sakit.
Lakip usab sa mga inisyatiba ang paggamit sa mobile X-ray van ug portable X-ray unit aron madala ang mga serbisyo sa pag-screen ug pag-diagnose sa TB ngadto sa mga komunidad.
Mitabang usab ang mga TB Navigator ug medical personnel sa paggiya sa mga pasyente gikan sa pagpa-diagnose hangtod sa pagpadayon sa ilang pagtambal.
Gipasalamatan ni Chan ang gobyerno sa Estados Unidos, DOH–Central Visayas Center for Health Development ug ang mga lokal nga health worker sa ilang kontribusyon sa pagpalig-on sa programa ug pagpalambo sa serbisyo alang sa mga residente sa Lapu-Lapu City.
