Nakigtagbo ang opisyales sa kagamhanang dakbayan sa Lapu-Lapu ngadto sa mga private sector partner niini aron sa hingpit nga pagpatuman sa gikahinam nga Lapu-Lapu Expressway (LLEX) project sulod sa maong syudad.
Mismong si Lapu-Lapu City Congressman-Elect ug Outgoing Mayor Junard “Ahong” Chan ang nangulo sa maong malampuson coordination meeting tali sa mga representantes sa mga key private sector partners niini.
Lakip sa mitambong sa maong panagpulong kay ang mga kadagkuan sa MVP Group of Companies nga gipangulohan ni Metro Pacific Tollways Corporation (MPTC) Chairman Manny V. Pangilinan kauban silang Beatrice Gonzalez-Magallanes, ang Group Senior Executive Vice President for Finance and Treasury sa Ulticon Builders Inc., ug si Francis Lloyd Chua, Chairman ug CEO sa Premium Megastructures Inc. (PMI) ug uban pa aron hisgutan ang mga strategic development sa maong expressway project.
Ang LLEX kay usa ka 12-kilometer, four-lane expressway nga gidesinyo aron pagpagaan sa kahimtang sa lakat sa trapiko ug pagpalambo sa road connectivity sa dakbayan sa Lapu-Lapu ug mga kasikbit nga lungsod ug dakbayan niini.
Nagbalor ang proyekto sa P27-bilyones diin sa higayong matapos kini kay gilaumang makalaslas sa oras sa byahe sa mga sakyanan nga mupadulong sa Mactan-Cebu International Airport (MCIA) gikan sa kapin 35 minutos ngadto nalang sa 12 minutos.
Dugang pa nga ang LLEX kay gipanglantawang usa ka mahinungdanong solusyon sa imprastraktura aron matubag ang nagkadaghang panginahanglanon sa transportasyon sa siyudad nga ipatuman ubos sa usa ka Public-Private Partnership (PPP) scheme.
