CEBU – Misaad si Lapu-Lapu City Mayor Junard “Ahong” Chan nga hatagan og stable nga suplay sa kuryente ang Isla sa Olango human namatikdan nga daghang mga indibidwal ang mipadayag og interes nga mamuhunan sa isla.
Una nang gibutyag ni Chan nga nabalik na ang kuryente sa Isla sa Olango human sa pagkuso-kuso sa Bagyong Odette niadtong Disyembre 2021, apan aduna gihapoy mga 5%nga kinahanglang mahatagan og kuryente, ilabina sa mga interior nga lugar.
Nanghinaot ang mayor nga hingpit nang mabalik ang elektrisidad sulod sa mga franchise area sa Mactan Electric Company (Meco), ang power distributor nga nag-alagad sa dakbayan sa Lapu-Lapu, apil na ang Isla sa Olango ug lungsod sa Cordova sa labing daling panahon.
Atol sa iyang pakigpulong sa inaugural session sa 16th Sangguniang Panlungsod, gitinguha sa reelected mayor nga wala nay brownout sa Olango, sanglit ila usab nga gitinguha ang pagbutang og solar lamps sa tanang poste alang sa seguridad sa mga residente.
