LAPU-LAPU CITY- Nagdeklara og State of Preparedness ang lokal nga kagamhanan sa Lapu-Lapu City agig pagpangandam sa posibleng epekto sa nagpadayon nga kagubot sa Middle East, ilabina sa gipaabot nga pagsaka sa presyo sa petrolyo ug mga batakang palaliton.
Sa pahayag sa syudad, gi-awhag ang mga Oponganons nga maghimo og simple apan epektibong mga lakang aron makunhuran ang epekto sa global nga krisis sa ekonomiya nga mahimong mopataas sa gasto sa transportasyon, suplay sa enerhiya, ug uban pang panginahanglanon.
Lakip sa mga gi-awhag nga buhaton sa katawhan ang maampingong pagplano sa biyahe pinaagi sa paglikay sa dili kinahanglan nga lakaw, pag-carpool, o paggamit sa paglakaw ug pagbisikleta aron makadaginot sa gasolina.
Giduso usab sa syudad ang pagtipid sa kuryente pinaagi sa paggamit lamang sa air conditioning kung gikinahanglan ug pagpalong sa suga ug appliances kung dili gamiton.
Gipasidan-an usab ang publiko nga mahimong adunay kakulang sa suplay sa tubig, busa gidasig ang paggamit sa rain catchment systems ug pag-amping sa paggamit sa tubig.
Gipahinumduman usab ang katawhan nga mopalit lamang sa gikinahanglan, likayan ang food waste, ug suportahan ang lokal nga mga produkto ug gagmayng negosyante, samtang gilikayan ang panic buying ug dili patas nga pagpataas sa presyo sa mga baligya.
Giduso usab sa pamunuan sa syudad ang panaghiusa, disiplina, ug pag-amping sa matag pamilya samtang nagpadayon ang tensyon sa Middle East, ug nanawagan sa pag-ampo alang sa kalinaw ug kaluwasan sa mga tawo didto.
