LAPU-LAPU CITY-Andam na sa paghatag og seguridad sa Kadaugan sa Mactan 2025 ang kapulisan sa Dakbayan sa Lapu lapu nga ipahigayon sa Mactan Liberty Shrine karog adlaw sa Dominggo, Abril 27, 2025.
Sa pakighinabi sa Bombo Radyo Cebu Newsteam kang Police Lt. Col. Christian Torres, ang tigpamaba sa Lapu-lapu City Police Office iyang gibutyag nga adunay gibana-bana nga kapin sa 500 ka mga kapulisan ug ingon man mga sakop sa Armed Forces of the Philippines ang ipakatap sa maong kalihokan.
Subay niini, sugod kaganihang alas 5 sa kadlawon karong adlawa aduna na silay pre-deployment briefing alang sa mga ipakatap nga mga police personnel.
Gawas sa reenactment, giandam usab sa kagamhanan sa dakbayan ang ubang mga kalihukan aron matagamtaman ang selebrasyon sama sa Sadsad sa Kadaugan, usa ka street dance festival nga magpasundayag ug lagsik nga mga pasundayag gikan sa 30 ka barangay sa dakbayan, nga gigrupo ngadto sa 10 ka mga contingents.
Adunay usab mga food and job fairs, talent competitions, ug night performances alang sa tibuok buwan nga kasaulogan sa Kadaugan sa Mactan sa dakbayan.
Ang Kadaugan sa Mactan maoy usa ka tinuig nga selebrasyon nga nagpasidungog sa kadaugan ni Datu Lapulapu ug sa iyang mga manggugubat batok sa mga pwersang Espanyol nga gipangulohan ni Ferdinand Magellan niadtong Abril 27, 1521.
