Cebu City-Pakyas ang retrieval team nga makuha ang gituohang patayng lawas ni Bien Unido Bohol Mayor Gisela Boniel sa kadagatan nga napatung-an sa Kobial ug Olanggo island sa dakbayan sa Lapulapu.
Kini human nga nga temporaryo nga gihunong sa retrieval team ganihang ala-una sa hapon ang retrieval operation human nga nahurot na ang oxygen nga gigamit sa mga divers ingon man usab sa kakusog sa current sa tubig sa maong lugar. Matud ni Rene Tatoy, ang lead diver sa retrieval team nga mubalik sila sa pagsalum ugma sa buntag.
Nasayran nga kapin sa 20 ka mga divers gikan sa nagkalain laing mga grupo apil na ang mga Korean Nationals ang mitabang sa pagpangita sa lawas ni Mayor Gisela Boniel nga gitagak sa maong dapit human kini giingong gipusil sa iyahang kaugalingong bana nga si Bohol 2nd District Board Member Rey Niño Boniel.
