CEBU CITY-Nipalag ang kampo ni suspended Cebu City Mayor Michael Rama sa Special National Executive Board Meeting nga gipatawag ni Bacolod City Mayor Albee Benitez nga gikatakda gahapn Biyernes, Hulyo 19.
Sa press briefing sa Makati City, si Mayor Rama niingon, nga ang gipatawag nga meeting pinaagi sa advisory nga pinetsahan og Hulyo 17 usa ka “political maneuver” aron matangtang siya isip presidente sa League of the Cities of the Philippines (LCP).
Gihisgutan usab sa kampo ni Rama nga subay sa Constitution and By-Laws sa LCP, mahimong matangtang ang usa ka Board Member sa usa ka tigum nga espesyal nga gipatawag alang niini nga katuyoan.
Dugang pa ni Mayor Rama nga “irregular” ang maong advisory ug walay “legal effect” ang bisan unsang kasabotan nga maabot dinhi.
Gitataw ni Mayor Rama, dili siya “absent” ug andam siyang motuman sa iyang tahas isip presidente sa LCP.
Iyang gipasabot, ang preventive suspension nga gipahamtang sa Office of the Ombudsman kay aron tugotan ang administrative investigation ug dili kini katumbas sa silot sa pagkatangtang sa katungdanan.
Una nang nipatawag si Mayor Benitez ang Special National Executive Board Meeting nga adunay duha lang ka adlaw nga pahibalo, nga direktang nakalapas sa Konstitusyon ug By-Laws sa LCP.
Kini nga mga dokumento nag-ingon nga ang pahibalo kinahanglan ipadala labing menos 15 ka adlaw sa wala pa ang gikatakda nga petsa sa meeting.
Dugang pa, ang advisory naghisgot nga ang miting maghisgot sa “urgent internal matters” nga dili klaro nga gipahayag ug sukwahi sa kinahanglanon nga ang agenda alang sa bisan unsang meeting kinahanglan nga ipasabut ug i-itemize.
Ang advisory dayag nga gisunod sa usa ka resolusyon nga gipagawas sa Negros Association of Chief Executives, Inc. niadtong Mayo 10, 2024, diin miyembro usab si Benitez.
Matod sa resolusyon, gipatawag ang mga opisyal sa LCP ug Board of Directors aron temporaryong tugotan si Benitez nga makatawag sa liga tungod kay giingung “absent” si Mayor Rama atol sa unom ka buwan nga pagkasuspenso.
Kahinumduman nga niadtong Mayo 2024, gisuspenso si Mayor Rama ug laing pito ka mga opisyal kalabot sa giingong wa pagbayad sa sweldo sa pipila ka mga empleyado sa city hall.
