Opisyal ng gipirmahan ni Presidente Ferdinand Marcos Jr. ang 2026 National Budget gahapong adlawa, Enero 5, diin usa na kini nga hingpit nga balaodnon ug nagkantidad og 6.793 trillion pesos.
Apan, angay nga hinomdoman usab nga giveto ni Presidente Ferdinand Marcos Jr. ang P92.5 bilyon o 38 % sa unprogrammed appropriations ubos sa 2026 General Appropriations Act (GAA), kay aron maseguro nga husto ang paggasto sa panudlanan sa nasod.
Tungod niini, ang unprogrammed appropriations sa 2026 national budget nigamay na lang ngadto sa P150.9 bilyon. Mas gamay kini og dako kon itandi sa P531.67 bilyon niadtong 2025.
Busa, ekslusibong gikab-ot sa Bombo Radyo Cebu Newsteam ang habig ni Danilo Arao, Kontra Daya Convenor aron sutaon ang iyahang opinyon nga sa maong budget, tinud-anay ba nga wala na kini kalambigitan sa pork barrel.
Matod niya, gikinahanglan hinomdoman ang kantidad nga giveto sa presidente, tungod kay walay katin-awan kung diin ang tinubdan sa financing o ang tinubdan sa pundo sa maong budget, ingun man alang niya, adunay posibilidad nga gamiton kini alang sa sunod nga piniliay o sa bisan unsa mang tumong sa mga naglingkod karon sa kasamtangan.
Gani, gitataw ni Arao nga hinungdan nga ang nagkalain-laing grupo ug indibidwal nag ingun nga pork barrel gihapon kini sa kabahin na sa hisgutanan sa nasudnong panudlanan.
Gidugang niya nga dili na ikahibolong nga adunay mga legislators nga naghinam-hinam nga kwestyonon kini ngadto sa Korte Suprema, gawas sa laing Kongresista nga niluwat sa ilahang pamahayag sa pagbabag sa maong national budget.
