Nagpahigayon og final meeting ang Local Government Unit (LGU) sa Sugbo, ilabi na gayud ang Cebu City Government, Cebu Provincial Government, Mandaue City ug ang Lapu-Lapu City, kini alang sa hingpit nga pagpangandam sa ASEAN Leader Summit 2026.
Ang ASEAN Leader Summit karong tuiga ipahigayon sa syudad sa Lapu-Lapu kung diin sa naasoyng meeting, ang nag-unang pagahisgutan niini mao ang mga posibleng matabang sa mga kasikbit nga mga LGU nga makamintinar sa kahapsay, kalinaw, ug seguridad samtang anaa ang mga deligado.
Samtang sa syudad sa Sugbo, gipokusan niini ang dagan sa trapiko, ug ingun man ang deployment sa mga traffic enforcers ilabi na nga adunay pipila sa mga delegado ibutang sa usa ka iladong hotel sa South Road Property (SRP).
Ingun man nga nagsiguro usab kini nga dili makahimamat og mga kabalda sa pagbyahe gikan sa syudad sa Lapu-Lapu pa-ingun sa syudad sa Sugbo.
Sa bahin usab sa pagpanglimpyo, ma-obserbaran partikular sa Pasil Area, diin namatyagan ang makanunayong pagpanglimpyo sa City Government aron mamintinar kini ug dili hugaw ang makit-an sa higayon nga molabay na ang mga delegado.
Sumala sa gikabutyag ni Cebu City Mayor Nestor Archival, ang pokus karon sa Cebu City Government mao ang kalimpyohon, trapiko ug ang siguridad.
Gitino usab ni Archival nga gibana-bana nga anaa na sa 50% ang ilahang kalimpyohon sa Pasil ning dakbayan sa Sugbo, diin padayon gihapon silang nangita og paagi nga makompleto ug hingpit na ang kalimpyohon niining dapita.
Samtang gi-asoy usab ni Archival nga adunay task force team alang sa ASEAN ang gihimo ug naglangkob kini sa City Administrator, Department of General Services (DGS), City Traffic Operations Management (CITOM), ug uban pa kinsa mao ang gitahasan nga mohimo sa pagtan-aw ug mobana-bana nga hingpit ug kompleto na ba ang tanang pagpangandam.
