CEBU CITY-Gilantaw karun sa lokal nga kagamhanan sa Buenavista, Guimaras ang pagsulud nila sa imbestigasyon sa nahitabu nga trahedya sa Guimaras-Iloilo Strait.
Gibutyag ni Buenavista Mayor Eugenio Reyes nga plano sa executive level nga magpahigayun usab ug imbestigasyon sa nahitabu nga boat incident arun nga masayran ang mga kakuwangan sa hingtungdan nga ahensya.
Matud ni Reyes nga mukuha kini og mga maritime experts ug abogado alang sa ipahigayun nga imbestigasyon.
Gipadayag sa mayor nga dili mahimu nga ipadaplin na lang ang nahitabu kung diin daghang kinabuhi ang nakalas ug giingung pinaagi sa imbestigasyon hayan mahatagan ug tubag ang pangutana sa matag pamilya sa mga biktima sa nahitabung trahedya.
Samtang, giangkun usab ni Mayor Reyes nga baho ug hugaw ang mga life jackets sa mga motorbanca ug uban pang watercrafts hinungdan nga iyahang nasabtan ang wala pagsul-ub sa mga pasahero niini.
Gihimug-atan sa opisyal kinsang atul usab nga nakasakay sa pinaka-una nga vessel nga mibyahe human nga gitugutan na sa coast guard ang paglawig, nga gikinahanglan usab ang ‘proper sanitation’ sa mga life jackets.
Apan iyahang giklaru nga kinahanglan nga sundon sa mga pasahero ang polisiya sa coast guard alang na usab sa kaluwasan sa tanan. (SBR)
