Cebu City-Mipagawas ug 200 thousand pesos nga reward money ang lokal nga kagamhanan sa lungsod sa San Fernando aron mapapaspas ang imbestigasyon sa kaso nga pagpusil patay kang Councilor Alexander Alicaway. Kini maoy gikumpirmar ni San Fernando Vice Mayor Fralz Sabalones.
Matud ni Sabalones nga nahisugtan sa ilahang mga opuisyal lakip na sa ilang mayor nga muhatag ug kwarta isip reward sa kung kinsa man ang makatabang aron masikop ang suspect nga maoy nipusil sa konsehal.
Sigon pa sa bise Mayor nga usa ka talinhaga alang kanla ang pagkamatay sa ilahang kauban sa konseho sanglit matud pa nga kalit kaayo ang panghitabo. Wala matud pa siyay nakitang rason aron patyon ang konsehal sanglit gumikan sa kamaayo niini sa iyahang trabaho isip konsehal sa maong lungsod.
Hinuon giangkon ni Sabalones nga dunay giimbestigahan karon ang konseho kabahin sa pagpamaligya ug mga sakyanan sa lungsod nga gialegar nga wala musubay sa proseso apan matud ni Sabalones nga wala pa man kini mahisguti sa ilang session.
Nasayran nga sa habig sa kapulisan, trabaho , personal nga kalagot ug pulitika maoy ilang gitan-aw nga anggulo sa maong kaso.
